E-kitabların üstünlükləri

Müasir dövrdə elektron kitablar çox sürətlə həyatımıza daxil olub. Digər texnoloji inkişaflar kimi onun da qarşısını almaq bizim əlimizdə deyil. Ən yaxşı üsul e-kitabların müsbət cəhətlərinə fokuslanmaqdır. Hər kəs sizə e-kitabın mənfi cəhətlərindən danışa bilər. Mən isə bu postda sizə elektron kitab oxumağın üstün cəhətlərindən danışmağı planlaşdırıram.

E-kitab oxumağın aşağıdakı üstünlükləri var:

1.     E-kitablar daha ucuzdur. Xaricdə e-kitablar çap olunmuş kitabların üçdə biri qiymətinə satılır. Bir dəfə e-reader əldə etdikdən sonra kitaba verəcəyiniz pul daha az olacaq. Əlbəttə ki, pulsuz kitablar da var.

2.     E-kitablar sayəsində daha az kağız istifadə oluna bilər. Bu da öz növbəsində daha az ağacın kəsilməsi deməkdir. Bu cəhət çox əhəmiyyətlidir.

3.     E-kitabların daşınması da olduqca asandır. Bir e-reader vasitəsilə onlarla e-kitab daşıya bilərsiniz. Beləliklə kitablarınızı çətinlik çəkmədən özünüzlə götürə və istədiyiniz zaman oxuya bilərsiniz.

4.     E-kitablar az yer tutur. 1-2 kitab problem olmasa da, yüzlərlə kitabı saxlamaq üçün böyük bir yer lazımdır. E-kitablar bu problemi tamamilə aradan qaldırır (Əlbəttə, bu fiziki kitab ehtiyacından imtina etmək demək deyiı).

5.     E-kitablarda axtarış və qeyd götürmək daha asandır. Elektron mühitdə olmağın verdiyi bir sıra digər üstünlüklər də var. Məsələn, axtarış panelində axtarış etdiyiniz kimi kitabda da axtarış edə bilərsiniz. İstədiyiniz yerə qeyd yerləşdirə və ya bookmark əlavə edə bilərsiniz.

6.     E-kitab oxuyarkən yazının ölçüsünü də dəyişdirə bilərsiniz. Elektron mühitdə olmağın avantajlarından biri olan bu xüsusiyyət sayəsində gözünüzü xırda bir ölçüyə zilləmək məcburiyyətində qalmırsınız.

7.     Eyni zamanda, e-kitabları əldə etmək çox sürətli və asandır. Bir e-kitabı bəyənəndən 5 dəqiqə sonra oxumağa başlaya bilərsiniz. Oturduğunuz yerdən tərpənmədən kitabı alın, yükləyin və oxumağa başlayın. Bu qədər sadə.

8.     E-kitabların saxlanması və qorunması çox daha asandır. Buna kiçik bir nümunə göstərək: İsgəndəriyyə Kitabxanası e-kitab olaraq saxlana bilsəydi, müasir dövrdə elm və texnika bəlkə də daha çox inkişaf etmiş olardı.

9.     E-kitabları istədiyiniz vaxt çap etdirə bilərsiniz.

Azərbaycanda e-kitab bazarı o qədər inkişaf etməsə də, bu sahədə canlanma özünü göstərməyə başlayıt. Belə ki, ölkəmizdə e-kitab satışı ilə məşğul olan ilk saytlardan biri www.readit.az saytıdır. Siz buradan, müxtəlif janrda olan kitabların əsas ideyaları ilə zəngin qısa məzmununu çox ucuz qiymətə əldə edərək, həm vaxtınıza, həm də büdcənizə qənaət edə bilərsiniz.

Biraz da e-readerlər haqqında.

Müasir dövrdə çap olunmuş kitabları oxumaq tutduğu yer, həcm, daşımaq baxımından müəyyən qədər əlverişsiz olduğundan gənclərin bir hissəsi elektron oxuyuculara üstünlük verir. Onların böyük hissəsini mobil telefonların oxuyucu proqramları, həmçinin planşet, noutbuk, netbuk və ev kompüterinin müvafiq proqramları təşkil edir. Sadalananların əksəriyyəti şüa-ekranlı olduğundan və kitab oxuyarkən göz daha diqqətlə ekrana zilləndiyindən bizim üçün ziyanlı və yorucudur. Ona görə də kitab oxumağın sürəti və müddəti adi kitab oxuyarkən olanda xeyli geri qalır. Məhz buna görə də, artıq bir neçə ildir ki, Qərbdə gözə demək olar ki, zərərsiz olan elektron-kitab oxuyucularının (e-readerlərin) istehsalına başlanılıb.

Müasir dövrdə ən geniş yayılmış və tanınmış e-readerlərə Amazon Kindle, Barners and Noble, Booken, Ectaco, Onyx, Pocketbook və s.-ni göstərmək olar. E-readerləri Azərbaycanda da online saytlar və ya mağazalardan əldə etmək mümkündür.